काठमाडौँ । गायिका एलिना चौहानका पूर्वपति विष्णु सापकोटाले सामाजिक संजालबाट आउने कठोर शब्द, धम्कीपूर्ण सन्देश, मानसिक दबाब र चरित्र हत्या गर्ने प्रयासले आफू मानसिक पीडाबाट गुज्रिएको बताएका छन् ।

उनले शुक्रबार सामाजिक सञ्जाल फेसबुकमा लेख्दै यस्तो बताएका हुन् । उनले गायिका चौहानसँग सहमतीमा सम्बन्ध विच्छेद भएपनि अहिले आफ्नो बारे बनेका अनावश्यक टिकटक भिडियो र भ्रामक गतिविधिले व्यक्तिगत र सामाजिक प्रतिष्ठामा गम्भीर असर पुर्‍याएको बताए। दुवै पक्षको समझदारीमा अदालतले निर्णय गरिसकेको विषयमा पुनः बोल्दै हिँड्नु अदालतको अपमान भएको समेत उनले बताए।

“अलग बसेको लगभग १ वर्ष र सम्बन्ध विच्छेद भएको ६ महिना कटिसक्दा पनि केही व्यक्तिले पुराना विषयहरू सामाजिक संजालमा ल्याउन थालेका छन्, जसले मेरो व्यक्तिगत जीवन, परिवार र व्यवसायिक वातावरणमा नकारात्मक असर पुर्‍याइरहेको छ” उनले लेखेका छन् ।

सापकोटाले मानहानी र व्यवसायिक नोक्सानीको क्षतिपूर्ति सहित अस्ट्रेलियामा कानूनी प्रक्रिया अघि बढाइसकेको पनि बताए । “कानुन सबैको लागि हुन्छ र न्यायको सहि मार्ग पनि त्यही हो” उनले लेखेका छन्। उनले आफ्नो मौनतालाई कमजोरीको रुपमा नलिन आग्रह समेत गरेका छन् ।