काठमाडौं नेपाल। लोक गायिका निरा छन्त्यालको पोखरा विमान दुर्घटनामा निधन भएपछि गायक विष्णु खत्री निरासँगै सहभागी हुने भन्ने भिमापोखराको कार्यक्रममा सहभागी नहुने भएका छन् ।

बाग्लुङको भिमापोखरामा प्रगतिशिल यूवा क्लबले आयोजना गरेको माघे संक्रान्ति मेलामा माघ ४ गते गायिका निरासँगै प्रस्तुति दिने मिती तय गरेका विष्णुले गायिका निधनपछि कार्यक्रममा आफू सहभागी नहुने जनाएका छन् ।

उनले भनेका छन्, “सांगीतिक क्षेत्रमा एउटा आशा लाग्दी बाग्लुङकी चेली गुमाउनु पर्दा पिडा त छ नै तसर्थ निरा बैनी र म आउने भनिएको यस कार्यक्रममा म एक्लै पुगेर गीत गाउन असमर्थ छु । उक्त दिन उनकै सम्झनामा मैले माईक नसमाउने निधो गरेको छु अर्थात कार्यक्रम उपस्थित हुन नसक्ने जानकारी गराउन चाहन्छु ।”

भिमापोखराको कार्यक्रममा विष्णुले निरालाई सिफारिस गरेका थिए । “उनको स्टेज प्रोगाम अति नै आकर्षक थियो भने दर्शक श्रोतालाई मनोरञ्जन दिलाउने कला र शैली अनौठो थियो । उनको दुर्घट्ना पछि यतिबेला म पनि मर्माहत छु ।” उनले भने ।

विष्णुले भिमपोखराबासी सँग क्षमा माग्दै अन्य कुनै अवसरमा उपस्थित भएर मनोरञ्जन दिने बाचा समेत गरे ।