कैलाली – “सुप इन्टरटेन्मेन्ट म्युजिक अवार्ड २०७९” को लागि आवेदन खुला भएको छ । सुप इन्टरटेन्मेन्ट हाउस प्रा.लि. धनगढीको आयोजनामा म्युजिक अवार्ड वितरण गर्न लागिएको हो ।
सुदूरपश्चिममा पहिलो पटक म्युजिक अवार्ड वितरण गर्न लागिएको हो।

सुदूपश्चिममा हालसम्म कुनै पनि म्युजिक अवार्ड प्रदान कार्यक्रम नभएकोले सुप इन्टरटेन्मेन्ट हाउस प्रा.लि. को आयोजनामा पहिलो पटक उक्त कार्यक्रम गर्न लागिएको प्रालिका अध्यक्ष अनुप चन्द ठकुरीले जानकारी दिए ।

देउडा, चौधरी र राना गीतहरु मध्येबाट बजारमा आएका गीत सङ्गीतका सर्जक, गायक र प्राविधिकहरुले उक्त अवार्ड कार्यक्रममा सहभागिता जनाउन पाउने जनाइएको छ ।

चौधरी मौलिक गीत, राना मौलिक गीत, देउडा मौलिक गीत, फ्युजन देउडा, लोक देउडा विधाहरु अवार्डको लागि छनौट हुनेछन् भने अडियोतर्फ गीतकार, संगीतकार, एरेन्जर, गायक गायिका रहनेछन् ।

त्यस्तै भिडियो तर्फ मोडल (पुरुष0, मोडल (महिला), छायांकार, सम्पादक र निर्देशक रहने आयोजकले जनाएको छ । यसैगरी सर्वोत्कृष्ट कला पत्रकारिता अवार्ड पनि प्रदान गरिने चन्दले बताए।
अवार्ड प्रतिस्पर्धाको लागि फागुन ४ गतेदेखि आवेदन फाराम खुल्ला गरीएको छ ।