दिनेश श्रेष्ठ र स्मृती गौतमको स्वरमा “यो दशैँमा राखिन जमरा” सार्वजनिक (भिडियो सहित)
वि.सं.२०८३ असोज २९ बिहीवार ०७:४३
राजु बोहरा, काठमाडौं । नेपालीहरूको महान् पर्व विजयादशमी नजिकिँदै गर्दा यस वर्षको दशैँ केही परिवारका लागि हर्षोल्लासभन्दा बढी पीडा र शोकको समय बनेको छ । भाद्र १० गते रसुवाको भोटेकोशी क्षेत्रमा आएको बाढीबाट ठूलो मानवीय क्षति भएपछि त्यसको पीडाले प्रभावित नुवाकोटको पञ्चकन्या गाउँपालिकाका धेरै स्थानीयवासीले यस वर्ष दशैँ पर्व विधिपूर्वक नमनाउने निर्णय गरेका छन् । उनीहरूले दशैँको प्रमुख सांस्कृतिक प्रतीकका रूपमा रहेको जमरासमेत नराख्ने निधो गरेको लोकप्रिय गायक तथा सर्जक दिनेश श्रेष्ठले जानकारी दिएका छन् ।
यही दुःखद परिस्थितिलाई भावनात्मक रूपमा समेट्दै गायक तथा सर्जक दिनेश श्रेष्ठले आफ्नो पछिल्लो दशैँ गीत ‘यो दशैँमा राखिन जमरा’ सार्वजनिक गरेका छन् । गीतमार्फत उनले विपत्तिमा ज्यान गुमाएका नेपालीहरूप्रति श्रद्धाञ्जली अर्पण गर्दै शोकमा डुबेका परिवार र समुदायको पीडालाई सांगीतिक अभिव्यक्ति दिएका छन् ।
दशैँ भन्नासाथ घरआँगनमा राखिने जमरा, निधारमा लगाइने रातो टीका, परिवारसँगको भेटघाट र खुसीयालीको सम्झना आउँछ । तर प्राकृतिक विपत्तिले निम्त्याएको असह्य पीडा र आफन्त गुमाउनुको दुःखका बीच सबैका लागि दशैँ उल्लासमय हुन सक्दैन । यही यथार्थलाई गीतको शीर्षक ‘यो दशैँमा राखिन जमरा’ ले मार्मिक रूपमा प्रस्तुत गरेको छ ।
दिनेश श्रेष्ठ नेपाली लोकदोहोरी तथा लोकसंगीत क्षेत्रमा सक्रिय गायक तथा सर्जक हुन् । नेपाली जनजीवन, सामाजिक परिवेश र आममानिसका भावनालाई गीतसंगीतमार्फत प्रस्तुत गर्ने प्रयास उनका सांगीतिक प्रस्तुतिको महत्वपूर्ण पक्षका रूपमा लिन सकिन्छ । यसपटक उनले मनोरञ्जन र उत्सवको पाटोलाई मात्र नभई दुःख, शोक र मानवीय संवेदनालाई प्राथमिकता दिँदै दशैँ गीत सार्वजनिक गरेका छन् । यसले लोकसंगीत केवल मनोरञ्जनको माध्यम मात्र नभई समाजको सुखदुःख र सामूहिक भावनाको प्रतिनिधित्व गर्ने सशक्त माध्यम पनि हो भन्ने सन्देश दिन्छ ।

‘यो दशैँमा राखिन जमरा’ मा दिनेश श्रेष्ठ र स्मृति गौतमको स्वर रहेको छ । गीतको लय राजकुमार खनाल र रामहरी भण्डारीले तयार पारेका हुन् भने शब्द प्रकाश पुरीका हुन् । गीतमा संगीत संयोजन नारायण दंगालले गरेका छन् । म्युजिक प्लस स्टुडियोमा रेकर्ड गरिएको यस गीतको निर्देशन निरेन श्रेष्ठले गरेका छन् । गीतको भिडियोमा दिनेश श्रेष्ठ र स्मृति गौतमको अभिनय रहेको छ ।
चाडपर्वका गीतहरूले सामान्यतया खुसी, उमंग, पारिवारिक मिलन र सांस्कृतिक परम्परालाई उजागर गर्छन् । तर यस गीतले विपत्तिको घाउ बोकेका मानिसको मनोभावनालाई समेट्दै परिस्थितिअनुसार चाडपर्व मनाउने शैली र भावनासमेत फरक हुन सक्ने सन्देश दिएको छ । दुःखमा परेका समुदायप्रति सहानुभूति प्रकट गर्नु र पीडितको भावनालाई सम्मान गर्नु नै यसको मूल मर्मका रूपमा देखिन्छ ।
गायक दिनेश श्रेष्ठको यो सांगीतिक प्रयासले दशैँको अवसरमा खुसी मनाउन नसकिरहेका परिवारहरूको पीडालाई आमश्रोतामाझ पुर्याउने अपेक्षा गर्न सकिन्छ । गीतले विपत्तिमा ज्यान गुमाएकाहरूको सम्झना गर्दै शोकमा रहेका परिवारप्रति सहानुभूति र मानवीय एकताको भावना जगाउने प्रयास गरेको छ ।
‘यो दशैँमा राखिन जमरा’ गीत दिनेश श्रेष्ठको आधिकारिक युट्युब च्यानलमार्फत सार्वजनिक गरिएको हो ।
भिडियो हेर्न तल क्लिक गर्नु होला ।
वि.सं.२०८३ असोज २९ बिहीवार ०७:४३














