काठमाडौं । राष्ट्रिय लोक सञ्चारकर्मी नेपालले संगीतकार तथा गायक राजेन्द्रकुमार कार्कीले पत्रकारमाथि गरेको गालीगलाैज र आक्षेप लगाउँदै बेइज्जत गरेकोमा गम्भीर ध्यानाकर्षण भएको जनाएको छ ।

राष्ट्रिय लोकसञ्चारकर्मी नेपालका कोषाध्यक्ष समेत रहेका शरणकुमार हुमागाईले सञ्चालन गरेको रेडियो आहा १०४.५ मेगाहर्जमा देउराली नामको कार्यक्रममा बुधबार साँझको अन्तर्वार्तापछि संगीतकार कार्कीले आफ्नो सामाजिक सञ्जाल फेसबुकमा सञ्चारकर्मी हुमागाईमाथि विभिन्न गालीगलाैज र आक्षेप लगाउँदै स्टाटस लखेका थिए ।

कार्कीको सोही गालीगलाैज र आक्षेपको विषयमा बिहीबार लोक सञ्चारकर्मी नेपालले एक प्रेस विज्ञप्ति प्रकाशन गर्दै गम्भीर ध्यानाकर्षण भएको जनाएको हो । राष्ट्रिय संगीतकर्मी संघका निवर्तमान अध्यक्ष समेत रहेका कार्कीले सञ्चारकर्मी हुमागाईलाई ‘पागल’, ‘ब्वाँसो’, बहिष्कार गरौँलगायत शब्द लेखेका थिए ।

हाल कार्कीको फेसबुकमा उक्त स्टाटस हटाइएको पाइएको छ । तर, स्टाटस हट्नुभन्दा पहिला नै स्क्रीनशट गरिएको थियो भने यतिबेला भाइरल भएको छ । राष्ट्रिय लोकसञ्चारकर्मी नेपालले कार्कीको उक्त प्रहार हुमागाईमाथि मात्रै केन्द्रित नभएर सम्पूर्ण पत्रकार एवं सञ्चारकर्मी जगतमाथि भन्दै गम्भीर ध्यानाकर्षण भएको जनाएको छ ।