रोमानिया पठाइदिने भन्दै सयौँ नेपाली ठगेको आरोप स् श्रीमान–श्रीमतीसहित तीन जनाविरुद्ध पक्राउ पुर्जी, उद्धव पाठक पक्राउ

काठमाडौं । वैदेशिक रोजगारीका लागि युरोपेली मुलुक रोमानिया पठाइदिने भन्दै सयौं नेपाली युवाबाट रकम असुलेर ठगी गरेको आरोपमा एक दम्पतीसहित ३ जना विरुद्ध पक्राउ पुर्जी जारी भएको छ। यस प्रकरणका मुख्य आरोपित मध्येका एक उद्धव पाठक भने हिजो मोरङबाट पक्राउ परेका छन्।

वैदेशिक रोजगार विभागले मोरङको रतुवामाई नगरपालिका–८ निवासी उद्धव पाठक तथा उनकी श्रीमती लेख माया पाण्डे (लीला पाण्डे) सहित अन्य व्यक्ति विरुद्ध पक्राउ पुर्जी जारी गरेको जनाएको छ। विभागको अनुसन्धान तथा मुद्धा शाखाका अनुसार रोधन सुब्बा (लिम्बू), मौसम आङ्देम्बे, अनिल ईवा लगायतका पीडितहरूले दिएको जाहेरीका आधारमा अनुसन्धान प्रक्रिया अघि बढाइएको हो।

विभागले जनाएको अनुसार वैदेशिक रोजगार न्यायाधिकरणबाट प्राप्त अनुमतिपछि प्रतिवादीहरूलाई पक्राउ गरी अनुसन्धान प्रक्रियामा ल्याउन काठमाडौं उपत्यका प्रहरी कार्यालय रानीपोखरी तथा मोरङ, इलाम र पाँचथर जिल्ला प्रहरी कार्यालयलाई पत्राचार गरिएको थियो। सोही क्रममा मुख्य आरोपित मध्यका उद्धव पाठक हिजो मोरङबाट पक्राउ परेका हुन्।

पीडितहरूको दाबी अनुसार आरोपितहरूले आकर्षक तलब र सहज रोजगारीको प्रलोभन देखाउँदै ठूलो संख्यामा नेपाली युवाबाट रकम उठाएका थिए। विदेश पठाइदिने आश्वासन दिए पनि धेरैलाई नपठाएको तथा रकमसमेत फिर्ता नगरेको आरोप उनीहरूमाथि लागेको छ। पीडितहरूले दिएको जानकारी अनुसार यस प्रकरणमा उद्धव पाठक र लेख माया पाण्डे दम्पतीको मुख्य भूमिका रहेको दाबी गरिएको छ। उनीहरूले रोमानिया सहित युरोपका विभिन्न मुलुकमा रोजगारीको अवसर रहेको भन्दै युवाहरूबाट लाखौँ रुपैयाँ संकलन गरेको आरोप छ।

उद्धव पाठक पक्राउ परेसँगै अन्य फरार आरोपितहरूको खोजी तथा अनुसन्धानलाई तीव्र बनाइएको नेपाल प्रहरीले जनाएको छ। उनीहरू नेपाल तथा विदेशमा लुकेर बसिरहेको हुन सक्ने आशंकाका आधारमा विभिन्न निकाय मार्फत खोजी कार्य भइरहेको विभाग स्रोतले जनाएको छ।

उद्धव पाठक माथी थप अनुसन्धान भइरहेको छ भने अन्य आरोपितहरूलाई पक्राउ गरी कानुनी प्रक्रियामा ल्याउने प्रयास जारी रहेको जनाइएको छ। आरोपितहरू माथि लागेको आरोप सम्बन्धमा अन्तिम कानुनी निर्णय भने हुन बाँकी रहेको छ।