काठमाडौं । कलाकार जयनन्द लामाको निधन भएको छ । पाँच दशकअघि गायन यात्रा शुरू गरेका ख्यातिप्राप्त लोक गायक, संकलक, अभिनेता, निर्माता तथा निर्देशक जयनन्द लामाको बुधबार बिहान २ बजे निधन भएको पारिवारिक स्रोतले जानकारी दिएको छ ।

२०२७ सालबाट लोकगीत गाउन शुरू गरी पछिल्ला केही वर्षयता सर्वाधिक रुचाइएका अभिनेताका रूपमा छाउँदै आएका लामाका मुलाको चाना, उही चाना, पानी पर्यो बलेसी, हेलम्बु डाँडापारि, मेरो माया छ भने त्यता, कलकत्ते काइँयो केश मेरो बाँगो, लौन हजुर के गरौँ नक्कलीलाई पातलीलाई कसरी बे गरुँ, चुईं चुईं चुइँकने जुत्ता, केको साँचो डल्ली रेशम फलामको साँचो, पानको पात, सलल पानी यही बस्यो बानी आँखैमा गाँजलु काखैमा मादलुजस्ता दर्जनौं लोकगीत अहिले पनि उत्तिकै लोकप्रिय छन् । लामाले दर्जनौं नेपाली चलचित्रहरुमा समेत शसक्त अभिनय गरेका छन् ।

लामाले राती घरमा आउने क्रममा आफैं गाडी चलाएर आएको र गाडीबाट निस्कने क्रममा लडेर तत्कालै निधन भएको बताइएको छ । गायक लामाको पारिवारिक संस्कार अनुसार दाह संस्कार गरिने र त्यो भन्दा अगाडि भोली बिहीबार बिहान १० बजे अन्तिम श्रद्धाञ्जलीको लागि सांस्कृतिक संस्थान जमलमा राखिने समेत जानकारी प्राप्त भएको छ ।