काठमाडौं, नेपाल । यही मंसिर २० गरेका दिन डा.भिम राव अम्बेडकरको “६७ औ परीनिर्वाण समारोह” नेपाल राष्ट्रिय दलित समाज कल्याण संघको हलमा सम्पन्न भएको छ।

नेपाल भारत दलित मैत्री संघको आयोजनामा तथा नेपाल राष्ट्रिय दलित समाज कल्याण संघको सह आयोजनामा सम्पन्न भएको उक्त कार्यक्रम नेपाल भारत दलित मैत्री संघका अध्यक्ष ओम प्रकाश विश्वकर्माको अध्यक्षतामा सम्पन्न भएको हो।

नेपाल राष्ट्रिय दलित समाज कल्याण संघका राष्ट्रिय अध्यक्ष अधिवक्ता त्रिलोक चन्द विश्वास बिकले सहजिकरण गरेको उक्त कार्यक्रममा पुर्व माननीय विजुल विश्वकर्मा, राष्ट्रिय दलित आयोगका पुर्व सदस्य माननीय लोक बहादुर बिक, सेवलराम हरिजन, दलित अधिकारकर्मी गजाधर सुनार, डि.एन.एफ. का महासचिब एकराज लकानद्री, नेपाल दलित संघका सचिव भिमसेन दमै लगायतका दलित अधिकारकर्मीहरुले मन्तव्य राखेका थिए।

बक्ताहरुले डा. अम्बेडकरको अगुवाइमा भारतको सम्विधान २ बर्ष ११ महिना १८ दिनमा तयार भएको कुरा स्मरण गर्दै नेपालका सबै राजनैतिक दलहरुले स्थानीय तथा आम निर्वाचनमा दलितहरुलाई भोट बैंक बनाएको तर उक्त समुदायको शुन्य प्रतिनिधित्व भएकोमा घोर आपत्ती जनाएका थिए। आगामी दिनमा दलित समुदायको अर्थपूर्ण सहभागिताका लागि सामुहिक अभियान सशक्त बनाउने ऐक्यबद्धता गरिएको छ।