काठमाडौं। “९औँ राष्ट्रिय रनिङ शिल्ड दोहोरीगीत प्रतियोगिता–२०८३” को उपाधि निशान्त विक र संगीना थापा मगर (प्रतिष्ठान उपत्यका समन्वय समिति (ख)ले जितेका छन्। उनीहरूले १७ टोलीलाई पछि पार्दै प्रथम स्थान हासिल गरेका हुन्। विदुर नगरपालिका–स्थित इलम प्रशिक्षण केन्द्रमा तीन दिनसम्म चलेको फाइनल प्रतियोगिताको अन्तिम नतिजा आइतबार राति घोषणा गरिएको थियो । विजेता जोडीले शिल्डसहित नगद ३ लाख रुपैयाँ पुरस्कार प्राप्त गरे ।

त्यस्तै, सरोज सिंखडा र जमुना विश्वकर्मा (प्रतिष्ठान बागमती प्रदेश (क) द्वितीय भए भने मानव रावत क्षेत्री र भावना अर्याल (प्रतिष्ठान मधेश प्रदेश (क) तृतीय घोषित भए । राजमान खत्री र शान्ता वली ९प्रतिष्ठान लुम्बिनी प्रदेश (ख) ले सान्त्वना पुरस्कार प्राप्त गरे। क्रमशः द्वितीयले २ लाख, तृतीयले १ लाख र सान्त्वनाले ५० हजार रुपैयाँ पुरस्कार पाए ।

प्रतियोगितामा विभिन्न विधागत उत्कृष्ट पनि चयन गरिएका छन् । उत्कृष्ट गायक राजु लामिछाने, उत्कृष्ट गायिका जमुना सुनार, उत्कृष्ट नव गायक बिक्रम गहतराज, उत्कृष्ट नव गायिका शीतल कल्पना विक घोषित भए । अनुशासित गायक बेलबहादुर परियार, अनुशासित गायिका शान्ति कार्की तथा उत्कृष्ट भेषभूषा (पुरुष) प्रितम पोखरेल र (महिला) सीता माझी बने ।

राष्ट्रिय लोक तथा दोहोरीगीत प्रतिष्ठान नेपालको आयोजनामा सम्पन्न प्रतियोगिताको उद्देश्य नेपाली लोकसंस्कृतिको संरक्षण, कलाकारको सम्मान र नयाँ प्रतिभाको प्रोत्साहन गर्नु रहेको आयोजकले जनाएको छ। प्रतिष्ठानकी अध्यक्ष रीता थापा मगरका अनुसार प्रतियोगिता अपेक्षाभन्दा भव्य रूपमा सम्पन्न भएको हो।

फाइनल चरणका लागि आन्तरिक छनोट मार्फत १८ टोली छनोट गरिएको थियो । कार्यक्रमलाई भव्य बनाउन सांस्कृतिक कार्यक्रम, अतिथि व्यवस्थापन तथा मञ्च सञ्चालनमा विभिन्न कलाकार तथा उपसमितिहरूको सक्रिय भूमिका रहेको थियो। करिब २० हजार दर्शकले अवलोकन गरेको प्रतियोगितामा बागमती प्रदेश संस्कृति तथा पर्यटन मन्त्रालय मुख्य संरक्षक रहेको थियो। विदुर नगरपालिका र टोखा नगरपालिका संरक्षकका रूपमा रहेका थिए भने नुवाकोट उद्योग वाणिज्य संघ प्रवद्र्धक र नुवाकोट निर्माण व्यवसायी संघ मुख्य सहयोगी संस्थाका रूपमा रहेका थिए।आयोजकले प्रतियोगितालाई सफल बनाउन सहयोग गर्ने सबै कलाकार, दर्शक, सञ्चारकर्मी तथा सरोकारवाला प्रति धन्यवाद व्यक्त गरेको छ।