काठमाडौं ।

नेपालीलाई नक्कली भुटानी शरणार्थी बनाएर अमेरिका पठाउने कार्यमा संलग्न रहेको आरोपमा पूर्व गृहमन्त्री समेत रहेका नेता बालकृष्ण खाण पक्राउ परेपछि नेपाली कांग्रेसले सहयोग गर्ने प्रतिक्रिया दिएको छ ।

खाणलाई बुधबार बिहान प्रहरीले राजधानीको चुच्चेपाटीबाट पक्राउ गरेको हो । खाणलाई पक्राउ गरिए लगत्तै जिल्ला प्रहरी परिसर काठमाडौँ लगिएको थियो ।

यसैबीच खाण पक्राउपछि कांग्रेस नेताहरूले निष्पक्ष छानविनका लागि पार्टीले सहयोग गर्ने प्रतिक्रिया दिएका छन् ।

कांग्रेस नेता शेखर कोइरालाले नक्कली शरणार्थी प्रकरणका दोषीलाई कारबाही हुनुपर्ने बताएका छन् । बुधबार बिहान विराटनगरमा सञ्चारकर्मीसँग कुरा गर्दै कोइरालाले दोषीले सजाय पाउनुपर्ने र त्यसका लागि पार्टीले सहयोग गर्ने बताएका हुन् ।

‘जो–जो दोषी हो, उनीहरूलाई कारबाही हुनपर्छ, यसमा राजनीतिक दबाब हुनु हुँदैन,’ उनले भने ।

यस्तै कांग्रेस सहमहामन्त्री महेन्द्र यादवले कांग्रेसले निष्पक्ष छानबिनका लागि सहयोग रहने बताए । उनले प्रहरीले अनुसन्धान गरिरहेको र अदालतले फैसला गर्ने हँदा आफुहरु निष्पक्ष छानबिनको पक्षमा रहेको बताए ।

यस्तै कांग्रेस केन्द्रीय सदस्य तथा सांसद रामहरि खतिवडाले दोषीलाई उम्काउने खेलमा कांग्रेस नलाग्ने बताएका छन् । उनी भन्छन्, निर्दोषलाई फसाउने होइन र दोषीलाई बचाउने होइन भन्ने हाम्रो कुरा रहन्छ । दोषीलाई उम्काउने खेलमा कांग्रेस नलाग्ने उनको प्रष्टोक्त्ती छ ।