नेपालले भारतीय बिधुत ऊर्जा बजारमा प्रतिस्पर्धी दरमा थप ३२५ मेगावाट विधुत बिक्रीको अनुमति पाएको छ । भारतको विधुत मन्त्रालय अन्तर्गतको केन्द्रीय विधुत प्राधिकरणले नेपाल विधुत प्राधिकरणलाई भारतीय विधुत बजारमा थप ३२५ मेगावाट विधुत बिक्री गर्न स्वीकृति दिएको हो ।

यसअघि २०७८ कात्तिकमा पहिलो चरणमा ३९ मेगावाट विधुत भारतीय ऊर्जा एक्सचेन्जमा बिक्री गर्न स्वीकृति दिएको थियो । यो सँगै नेपालले भारतीय बजारमा ३६४ मेगावाटसम्म विधुत विक्री गर्न प्रवेश पाउने भएको छ । नेपालले थप विधुत निर्यातका लागि स्वीकृति पाएसँगै प्रधानमन्त्री शेरबहादुर देउवाको भारत भ्रमणका क्रममा उनका समकक्षी नरेन्द्र मोदीसँग भएको सहमति कार्यान्वयनको चरणमा प्रवेश गरेको ऊर्जा मन्त्रालयले जनाएको छ ।

यसबाट वर्षा याममा उत्पादित विधुत मुलुकभित्र खपत गरी अतिरिक्त विधुतको निर्यात भई दुई देशबीचको व्यापार घाटामा कमी आइ अर्थतन्त्रमा सकारात्मक योगदान पुग्ने मन्त्रालयले आशा व्यक्त गरेको छ ।