गजेन्द्रवहादुर खपाङगी’ईश्वर’ काठमाडौं। उमेरले झण्डै ८ दशक छुन लागिसक्यो,तर उहि जोश,उही जाँगर,उही सकृयता अनि उही गतिविधि । उहांको यो गतिविधि हेर्दा लाग्छ,भर्खरै २०-२५ वर्षको उमेर हो ।आफ्नो युवावस्थामा लाहुरे हुने रहरले सिंगापुर पुलिसमा भर्ना हुनु भएको र उतै कराते खेल सिकेर पछि लाहुरे जीवन परित्याग गरि वि.स.२०३४/३५ सालतिर नेपालमा सितोरियो कराते खेल भित्र्याउनु भएका संस्थापक गुरु थानेश्वर राई,नेपाली कराते खेल क्षेत्रमा महागुरुको उपनामले प्रख्यात छन । अझ भन्ने हो भने”सितोरियो कराते र महागुरु थानेश्वर”एक अर्काको पर्यायवाची हो भन्दा, फरक नपर्ला ।

नेपाली खेलकुदको सर्वोच्च निकाय राष्ट्रिय खेलकुद परिषदमा,करातेको प्रमुख प्रशिक्षक हुदै तालिम तथा प्रशिक्षण विभागको उप-निर्देशक सम्मको जिम्मेवारी सम्हालेपछि,स्वेच्छिक अवकाश लिएर परिषदवाट विदा भएका महागुरु राई करिव डेढ दशकदेखि अमेरिकामा वसोवास गर्दै आउनु भएकोछ । अमेरिकामा पनि सितोरियो कराते खेलको विकाश,प्रवर्द्धनमा लागिरहनु भएका महागुरु राई वेलावखत मातृभुमी आएर सितोरियो कराते खेललाई अझ प्रभावकारी र विकशित गर्न आफ्ना शिष्यहरुलाई अभिप्रेरित,निर्देशन र सल्लाह दिईरहनुहुन्छ ।

फ्रेन्डली,फरासिला,मिजासिलो स्वभाव र वेलावखत ठट्यौली गर्न मनपराउने गुरु थानेश्वर,नेपाली करातेकर्मीहरुको मन-मनमा कण्ठस्थ भएको एउटा कहिले नविर्सने प्रख्यात नाम वनेकोछ । अमेरिकामा पनि कराते खेलमा उत्तिकै सक्रिय रहेको र उता हुने हरेक गतविधि,प्रतियोगिता,उदघाटन लगायत खेलकुदमा उहाँको सहभागिता निरन्तर रहदै आएकोछ । महागुरु थानेश्वरको लय, गति र निरन्तरतालाई पछ्याउन सके,प्रत्येक करातेकर्मीहरु सफल हुनेमा दुईमत नरहने उहाको सक्रियताले सवैलाई गतिलो सन्देश प्रवाह गरिरहेको छ ।

( लेखक, नेपाल सितोरियो कराते संघका प्रवक्ता तथा नेपाल स्वयमसेवक प्रशिक्षक खेलकुद महासंघका अध्यक्ष एवम वरिष्ठ करातेकर्मी हुनुहुन्छ । )