मनोरन्जनात्मक शैलीमा एउटा संस्कारलाई नजिकबाट प्रस्तुत गरिएको गुरुङ भाषाको चलचित्र ‘स्युरु’ (भावनाको गाँठो) यूकेमा प्रदर्शन हुने भएको छ ।

आउँदो सेप्टेम्बर ९ तारिख २०२२ का दिन एम्पायर हल अल्डरसटमा साँझ ६ बजे चलचित्र स्युरु प्रदर्शनको तयारी रहेको संस्कृतिका जानकार एकेन्द्र गुरुङले जानकारी दिए । उनले चलचित्र हेरेर लोप हुँदै गइरहेको संस्कारलाई सुझावस्वरुप प्रतिक्रिया दिनसमेत अनुरोध गरेका छन् । चलचित्र सोम गुरुङको निर्देशनमा बनेको हो ।

‘गुरुङ संस्कृति र कलामा धनी मानिन्छ । यद्यपि आज बसाइँसराईको कारण गुरुङ भाषा, संस्कार र संकृति लोपोन्मुख अवस्थामा छ । भाषाविद्हरु चलचित्रको सम्वादहरु, गीतहरु, भिडियोहरु, भिजुअलहरु र धर्मगुरुहरुले वाचन गर्ने शास्त्रको मन्त्र, श्लोकको वचनहरु नै यसलाई बचाउने सजिलो उपाय भन्छन् ।

गुरुङले भनेका छन् “चलचित्र हेर्न मनोरञ्जनमात्रै नभएर भाषा र संस्कृति प्रवर्द्धन पनि हो भन्ने बुझेर चलचित्र स्युरु हेर्न आइदिनुहुन अनुरोध छ ।” उक्त चलचित्र ‘स्यु रु’ काठमाडौ र पोखराका विभिन्न गाउँमा च्यारिटी सो गरिएको थियो । उक्त चलचित्रलाई हेर्ने दर्शकहरुले निकै उत्कृष्ट बनेको प्रतिक्रिया व्यक्त गरेका थिए ।

प्रदर्शनका बारेमा जानकारी आवश्यक परे मेजर डमर घले, एकेन्द्र गुरुङ र जुमकाजी गुरुङलाई सम्पर्क गर्न सकिने आयोजकले जनाएको छ ।