काठमाडौं । नेपाली कांग्रेस काभ्रेले क्षेत्र नम्बर २ ‘क’ बाट युवा नेता होमराज चौलागाईंको नाम प्रत्यक्षतर्फ सिफारिस गरेको छ । स्थानीय स्तरमा सामाजिक कार्यबाट आफ्नो लोकप्रिय र विकासप्रेमी युवा नेताको छवि बनाएका चौलागाईंलाई काँग्रेसको जिल्ला समितिले सिफारिस गरेको हो ।

समाजसेवीको रुपमा परिचित नेता चौलागाईं सफल उद्यमीसमेत हुन् । नेपाली कांग्रेसमा मात्र नभै निष्पक्ष रुपमा सबैको प्रिय नेताका रुपमा परिचित उनी जनजनमा बस्न सफल मानिन्छन् । नेता चौलागाईं कांग्रेस बाग्मती प्रदेशका सदस्य पनि हुन् । उनलाई प्रदेशसभामा लैजानको लागि उक्त क्षेत्रका जनताले नेतृत्वसमक्ष दबाब सिर्जना गरेका थिए । जिल्ला नेतृत्वले उनको नाम सिफारिस गरेर पठाएपछि स्थानीयहरुले खुसी व्यक्त गरेका छन् ।

कोरोना महामारीको बेलामा उनले खेलेको भूमिका र विकासप्रतिको लगावको कारण उक्त क्षेत्रका जनताले उनलाई यसपटक सदनमा देख्न चाहेका छन् । चौलागाईंले नेतृत्व दिएका संस्थाहरुले हजारौंको संख्यामा रोजगारी सिर्जना गरेका छन् ।

स्थानीयहरुले पार्टीको जिल्ला नेतृत्वले राम्रो निर्णय गरेको र पार्टीको केन्द्रीय नेतृत्वले पनि स्थानीय जनताको भावनाको कदर गरेर निर्णय गर्नेमा आफूहरु ढुक्क रहेको प्रतिक्रिया दिएका छन् । यसअघि समाजसेवीको रुपमा जनताको विश्वास जितेका चौलागाईंलाई जनअनुमोदित जनप्रतिनिधिको रुपमा चुन्न पाउनु आफूहरुको भाग्य भएको स्थानीय जनताको भनाई रहेको छ ।