काठमाडौं। नेपाली सांगीतिक बजार संगीतमय बन्दै गएको छ। पछिल्लो समय एकपछि अर्को गरेर नयाँ नयाँ गीतहरु सार्वजनिक भईरहेका छन्। सोही क्रममा चर्चित गायिका सुनितामी परियारको नयाँ गीत “माया हिरिक्कै” केही साता अघी सार्वजनिक भएको छ। यस गीतले छोटो समय मै लाखौ दर्शकहरुको माया पाउन सफल भएको छ। 

लोक शैलीको यस गीतमा उनै सुनितामी परियार र चर्चित संगीतकार तथा गायक बसन्त थापाको स्वर रहेको छ भने भिडियोमा स्वयं परियार र चर्चित नायक पल शाहको आकर्षक अभिनय रहेको छ।

गीतमा चर्चित गीतकार नवराज पन्तको शब्द र श्यामश्वेत रसाइलीको संगीत संयोजन रहेको छ । म्युजिक भिडियोमा गम्भीर बिष्टको रहेको छ भने पवन सुस्लिङको छायांकन, प्रबिन भट्टको सम्पादन रहेको छ। गायिका सुनितामी परियारले हालसम्म करिब एक हजार गीतमा स्वर दिइसकेकी छन् र गायनसँगै अभिनय तथा नृत्यमा पनि सक्रिय रहँदै आएकी छिन् ।

चार बर्षअघि खेम सेन्चुरीसँग गाएको “रुमाल साट्न पर्दैन” गीत निकै चर्चित बनेको थियो, जसमा नायिका केकी अधिकारीको अभिनय देख्न सकिन्छ । उक्त गीतले युट्युबमा करिब ५० लाख भ्युज पाउँदै उल्लेखनीय सफलता हासिल गरेको थियो। यस्तै पञ्चेवाजा गीत “सुनी मायालाई” गीतले पनी चर्चा पाउन सफल भएको थियो। उक्त गीतमा सुनितामी परियार सँगै इश्वर सिंहको स्वर रहेको छ ।

करिब डेढ दशकदेखि निरन्तर संगीत क्षेत्रमा सक्रिय परियारले हालसम्म १८ भन्दा बढी देशमा सांगीतिक प्रस्तुती दिइसकेकी छन् । केही समय अघि मात्र जापानका विभिन्न सहरमा एक महिना लामो सांगीतिक कार्यक्रम सम्पन्न गरेर फर्किएकी उनी नयाँ गीत ‘‘माया हिरिक्कै’ मार्फत पुनः दर्शकमाझ आएकी छन् ।

भिडियो हेर्न तलको लिंक क्लिक गर्नुहोला।