प्रकाश बराईली “अभिव्यक्ति”
कास्की /पोखरा

“लोक संस्कृति जोगाऔ, हाम्रो चिनारी बचाऔ” भन्ने मुल नारालाई आत्मसाथ गर्दै कल्याण शेरचन स्मृति प्रतिष्ठानद्वारा आयोजित “राष्ट्रिय खुल्ला दोहोरी गीत प्रतियोगिता र स्रष्टा सम्मान एवंम इन्द्रेणी कार्यक्रम” पोखरा स्थित सभागृहमा तेस्रो भब्य रुपले सञ्चालन भैरहेको छ । प्रतियोगिता सञ्चालन भएको तेस्रो दिन पनि दर्शकहरुको उत्साहजनक सहभागिता रहेको छ ।

लोक स्रष्टा, साधक तथा शिल्पी कल्याण शेरचनको ७६ औं जन्मजयन्तीको अवसरमा आयोजित सो प्रतियोगिता कल्याण शेरचनको शालिक निर्माण सहयोगार्थ आयोजना गरिएको कुरा आयोजक पक्षले जानकारी गराएको छ । कल्याण शेरचन स्मृति प्रतिष्ठान नेपालले आयोजना गरेको सो प्रतियोगिताका सहभागीहरु बीच दोस्रो चरणको प्रतियोगिता सुरु भएको छ । प्रतियोगिताको तेस्रो दिन दोस्रो चरणमा ३२ टोलीले प्रतिस्पर्धा गर्ने भएका छन् ।

साउन १२ गते देखि पोखरा सभागृहमा भएको प्रतियोगिता साउन १४ गते प्रतियोगिता सम्पन्न गर्ने आयोजकको योजना भएतापनी प्रतियोगीहरु धेरै भएको र समयको अभाब भएको कारणले २ दिन म्याद थप गरि साउन १६ गते प्रतियोगितालाई सम्पन्न गर्ने कुरा आयोजक पक्षले बताएको छ । प्रतियोगितामा सहभागिताका लागि विभिन्न जिल्ला र समूहबाट गरी ४८ टिमको सहभागीता रहेको छ।

गण्डकी प्रज्ञा–प्रतिष्ठान प्रमुख सहकार्यमा रहेको छ भने पोखरा महानगरपालिका प्रबर्द्धक, पोखरा प्रज्ञा–प्रतिष्ठान, राष्ट्रिय लोक तथा दोहोरीगीत प्रतिष्ठान नेपाल केन्द्रिय समिति संगै प्रतिष्ठान मातहतका विभिन्न प्रदेश र जिल्ला शाखाहरु, इन्द्रेणी सांस्कृतिक समाज, काठमाण्डौ र हिमाली साँस्कृतिक परिवार, पोखरा लगायतको सहकार्य गरेका छन् । प्रतियोगिताको तेस्रो दिन जीवन दाहाल र प्रजापति पराजुलीले सहजीकरण गर्दै प्रतियोगिता सञ्चालन गरेका छन् ।

प्रतियोगिताको तेस्रो दिन पनि कल्याण शेरचनको शालिक निर्माणका लागि सहयोग उठ्ने क्रम जारी छ । साथै कार्यक्रमलाई अझै सभ्य तथा भब्य रुपमा सफल बनाउन आर्थिक / नैतिक / भौतिक रुपमा सहयोग गरिदिन आयोजक पक्षले अनुरोध गरेको छ ।