राजधानीबाट अनगिन्ती सञ्चारकर्मीको जम्बो टोली लिएर गोरखा पुगेका राष्ट्रिय स्वतन्त्र पार्टी (रास्वपा)का प्रतिनिधिसभा उम्मेदवार सुदन गुरुङ पछिल्लो समय चर्चामा छन् । आगामी फागुन २१ गते हुने प्रतिनिधिसभा निर्वाचनका लागि गोरखा निर्वाचन क्षेत्र नम्बर–१ बाट उम्मेदवारी दिएसँगै गुरुङ आफ्नो क्षेत्रमा सक्रिय चुनावी प्रचार–प्रसारमा जुटिरहेका छन् । तर राजधानीबाट विभिन्न सञ्चारमाध्यमका पत्रकारहरू सहभागी गराइँदा गोरखाकै स्थायी बासिन्दा, स्थानीय गोर्खाली पत्रकार अनिल गुरुङलाई भने उक्त मिडिया टोलीमा समेटिएको नदेखिँदा यो विषय अहिले सामाजिक सञ्जालमा बहसको केन्द्र बनेको छ ।

विशेषगरी ‘आफ्नो क्षेत्र, आफ्नो माटो र आफ्नो समुदायबाट निरन्तर पत्रकारिता गर्दै आएका पत्रकारलाई किन बेवास्ता गरियो ?’ भन्ने प्रश्न यतिबेला उठ्न थालेको छ ।गोरखामा जन्मेका पत्रकार अनिल गुरुङ विगत करिब एक दशकदेखि पत्रकारिता क्षेत्रमा निरन्तर सक्रिय रहँदै आएका गुरुङ पत्रकार अनिल गुरुङलाई मिडिया टिममा नसमेटिनु सामान्य संयोग मात्र हो कि नियोजित बेवास्ता ? भन्ने जिज्ञासा सामाजिक सञ्जाल प्रयोगकर्ताहरूले उठाइरहेका छन् ।

अझ उम्मेदवार स्वयं गुरुङ समुदायका प्रतिनिधि भएकाले पनि ‘एक गुरुङ भएर अर्को गुरुङ पत्रकारलाई किन खोजी गरिएन ?’ भन्ने प्रश्नले थप चासो पाएको छ ।यसै सन्दर्भमा पत्रकार अनिल गुरुङले आफ्ना नजिकका केही पत्रकारसँग अनौपचारिक कुराकानीका क्रममा दुःख र असन्तुष्टि व्यक्त गरेको स्रोतले जनाएको छ । उनका अनुसार, “प्रस्ताव आएको थिएन भन्न मिल्दैन, तर कसैको गुलामी गरेर जानु भन्दा पनि आफ्नो भेग, आफ्नो माटो र आफ्नै समुदायबाट उम्मेदवारी दिएका व्यक्तिबाट नै सम्मानजनक प्रस्ताव आएको भए कुनै पनि शर्त र मागबिना साथ दिन तयार थिएँ,” भन्ने धारणा उनले राखेका छन् ।

उनको यो अभिव्यक्तिले स्थानीय पत्रकारहरूलाई राजनीतिक अभियानमा केवल प्रयोगको माध्यम बनाइन्छ कि सम्मानका साथ साझेदार ? भन्ने गम्भीर प्रश्नसमेत उठाएको छ । राजधानी केन्द्रित मिडियालाई प्राथमिकता दिँदा स्थानीय पत्रकारहरू उपेक्षित हुनु नयाँ विषय नभए पनि यसपटक यो विषय समुदायगत र भावनात्मक रूपमै जोडिएर आएको देखिन्छ । यता उम्मेदवार सुदन गुरुङ भने आफ्नो मौलिक गुरुङ पहिरनमा कार्यकर्ताहरूको उत्साहजनक उपस्थितिसहित गाउँ–गाउँ पुगेर चुनावी प्रचारमा सक्रिय देखिएका छन् ।

राजधानीबाट पुगेको मिडियाको ठूलो टोलीले उनको गतिविधिलाई व्यापक रूपमा कभर गरिरहेको छ । तर त्यही भिडमा गोरखाकै गुरुङ पत्रकार अनिल गुरुङ नदेखिनुले प्रश्नको घेरो झनै फराकिलो बनेको छ । सामाजिक सञ्जालमा कतिपयले यो विषयलाई ‘गुरुङ युवाहरूलाई राजनीति, पत्रकारिता र अन्य क्षेत्रमा किन दबाउने प्रयास गरिन्छ ?’ भन्ने ठूलो बहससँग जोडेर हेरिरहेका छन् । नयाँ सोच, नयाँ जोश र नयाँ जागरण बोकेका युवाहरूलाई अगाडि ल्याउने प्रतिबद्धता व्यक्त गर्ने नेताहरूले व्यवहारमा कत्तिको समावेशी भूमिका खेल्छन् भन्ने प्रश्न पनि सँगै उठेको छ ।

यद्यपि, यति सबै असन्तुष्टि र पीडाका बाबजुद पनि पत्रकार अनिल गुरुङले व्यक्तिगत कुण्ठा भन्दा माथि उठेर उम्मेदवार सुदन गुरुङलाई शुभकामना दिएका छन् । उनले अन्त्यमा भनेका छन्, “धेरै धेरै शुभकामना सुदनजी । तपाईंले वास्ता नगरे पनि तपाईंलाई हरपल हाम्रो मिडियाबाट साथ र सपोर्ट रहनेछ ।” यसरी एकातिर समावेशिता, विश्वास र स्थानीय प्रतिनिधित्वको बहस चर्किँदै गएको छ भने अर्कोतर्फ पत्रकार अनिल गुरुङको यो अभिव्यक्तिले पत्रकारिताको पेशागत मर्यादा, आत्मसम्मान र सिद्धान्तलाई पनि उजागर गरेको छ । यो विषय अब केवल व्यक्तिगत गुनासोमा सीमित नरही गोरखा र गुरुङ समुदायभित्रै गहिरो विमर्शको विषय बनेको छ