काठमाडौं। राष्ट्रिय लोक तथा दोहोरी गीत प्रतिष्ठान नेपाल, उपत्यका समन्वय समितिको आयोजनामा “बृहत् बनभोज तथा विविध सांस्कृतिक कार्यक्रम–२०८२” आयोजना हुने भएको छ। लोक तथा दोहोरी गीतको संरक्षण, प्रवर्द्धन र कलाकार बीच आपसी सद्भाव अभिवृद्धि गर्ने उद्देश्यका साथ कार्यक्रम आयोजना गर्न लागिएको कुरा समन्वय समितिका अध्यक्ष प्रसाद लामिछानेले बताएका छन् ।

“बृहत् बनभोज तथा विविध सांस्कृतिक कार्यक्रम” यही माघ १७ गते शनिबारका दिन बिहान ठिक ११ बजेदेखि काठमाडौंको टोखा स्थित भूतखेल मैदानमा सम्पन्न हुने छ। कार्यक्रममा लोक तथा दोहोरी क्षेत्रका प्रतिष्ठित कलाकारहरू, स्रष्टा, संगीतप्रेमी तथा शुभेच्छुकहरूको उल्लेख्य सहभागिता रहने अपेक्षा गरिएको छ। “बृहत् बनभोज तथा विविध सांस्कृतिक कार्यक्रम–२०८२” मा प्रमुख अतिथीको रुपमा प्रतिष्ठान की केन्द्रिय अध्यक्ष रिता थापा मगर रहने कुरा आयोजक पक्षले जानकारी गराएको छ।

उक्त कार्यक्रममा उपत्यका समन्वय समिति आयोजकको रुपमा हुने छ भने उपत्यका समन्वय समिति अन्तर्गतका १० वटै समिति सह-आयोजकको रुपमा रहेका छन्। सो अवसरमा राष्ट्रिय स्तरका ख्याती प्राप्त कलाकारहरुको प्रस्तुती र बिभिन्न मनोरञ्जनात्मक गतिविधिहरु समावेश रहने जानकारी गराउदै लोक संस्कृती प्रेमी सम्पूर्ण महानुभावलाई कार्यक्रममा उपस्थित भई कार्यक्रमको गरिमा बढाइदिन प्रचार प्रसार संयोजक प्रितम पोखरेलले अनुरोध गरेका छन्।