काठमाडौं । दर्जनौं लोकप्रिय गीतका सर्जक राजकुमार बगरको एकल गीत वाचन कार्यक्रम यही चैत २५ गते पोखरामा हुने भएको छ । गीतकार प्रतिष्ठान, नेपालको आयोजनामा गीतकार राज कुमार बगरको एकल गीत वाचन कार्यक्रम हुने भएको हो ।

पोखरा उद्योग वाणिज्य संघमा हुने कार्यक्रममा गीतकार बगरले आफ्नो नयाँ–पुराना दुई दर्जन गीत वाचन गर्ने छन् । दुई दर्जन मध्य एक दर्जन लोकप्रिय गीतहरु र एक दर्जन बिल्कुलै नयाँ गीतहरु बाचन हुने कुरा राज कुमार बगरले जानकारी दिएका छन् ।

आयोजक गीतकार प्रतिष्ठानका अध्यक्ष हरिहर खनियाले गीत संगीत भरेर गाउँदा मात्रै होइन्, गीतकारले वाचन गर्दा पनि कर्णप्रिय सुनिन्छ भन्ने ​सोचले यस प्रकारको कार्यक्रम सुरु गरिएको बताए ।

कविता–मुक्तक वाचन हुन सक्छ । त्यसैगरी गीत पनि वाचन हुन सक्छ र गीत संगीत भरेर गाउँदा मात्रै होइन्, गीतकारले वाचन गर्दा पनि कर्णप्रिय सुनिन्छ भन्ने सोचले गतवर्ष देखि यस प्रकारको कार्यक्रम सुरु गरेका हौं’ उनले भने । गत वर्ष तीर्थ श्रेष्ठको गीत वाचन गरिएको थियो भने यस वर्ष राजकुमार बगरले गीत वाचन गर्ने भएका छन् ।

एकल गीत वाचन गीतकार बगरको पहिलो अनुभव हो । गीतकारको यस प्रकारका कार्यक्रम बिरलै हुने गरेका छन् । यो मेरो पहिलो अनुभव भएकाले एकदमै उत्साहित छु’ बगरले भने । उडेर जून छुन्छु भन्थेँ’, ‘यता कुलो काट्दा’, ‘तिम्लाई आफ्नो भन्ने मेरो अधिकार गुमेपछि’ लगायतका आफ्ना​ करिब २ दर्जन गीत वाचन गर्ने राज कुमार बगरले बताए ।