काठमाडौं । मिस मगर इटरनेशनल सिजन १ को फारम खुलेको छ । मंगलबार राजधानीमा आयोजित पत्रकार सम्मेलन मार्फत मिस मगर इटरनेशनल सिजन १ को फारम खुलेको औपचारिक जानकारी गराइएको थियो । यस कार्यक्रमलाई देश तथा बिदेशबाट सहयोग आउनेक्रम जारी छ । सोही क्रममा कुनै बेला लोक दोहोरी क्षेत्रमा एकछत्र राज गरेकी मोडल रश्मी तामाङले आफ्नो जन्मदिनको अवसरमा मिस मगर ईन्टरनेशनललाई सफलताको शुभकामना सहित ५० हजार रुपैया आर्थिक सहयोग गरेकी छिन् ।

उनी हालः अमेरिकामा बसोबास् गर्दै आईरहेकी छिन् । अमेरिका बसेतापनि आफ्नो बिगतका पलहरु र लोक दोहोरी क्षेत्रलाई नबिर्सिएको उनले बताईन् । केही समयपछि नेपाल आएर म्युजिक भिडियो र फिल्म निर्माण गर्ने उनले जानकारी गराएकी छिन् । लोक दोहोरी क्षेत्रले नै मलाई यो स्थान सम्म पुराएकोले लोक दोहोरीलाई भुल्न सक्दिन । म लोक दोहोरी क्षेत्रलाई सक्दो सहयोग पनी गर्न सक्छु उनले भनिन् ।

देशभरबाट मिस मगर इटरनेशनल मा भाग लिन इच्छुकले वेबसाइट तथा सामाजिक सञ्जालमार्फत आवेदन दिन सकिनेछ । २०८० वैशाख २३ गते प्रतियोगीहरूको छनौट हुनेछ भने जेठ २० गते फाइनल कार्यक्रम हुनेछ । आयोजक सुनगाभा नेपालले मिस मगर इटरनेशनल मा भाग लिन केही सर्तहरू राखेको छ । जसअनुसार यस प्रतियोगितामा १८ वर्षदेखि २८ वर्ष उमेर समूहका मगर समुदायका युवतीहरूले भाग लिन सक्नेछन् । न्यूनतम् ५ फिट् १ इन्च उचाइ हुनुपर्नेछ । फर्मका लागि ३ हजार रूपैयाँ शुल्क तोकिएको छ । ३० प्रतिशत भोटिङ र ३५ प्रतिशत निर्णायक र ३५ प्रतिशत ट्यालेन्टका आधारमा उत्कृष्ट प्रतियोगिहरुको छनौट गरिने आयोजकले जनाएको छ ।

मिस मगर इन्टरनेश्नलको विजेतालाई ४ लाख रुपैयाँ नगद र आधा तोला सुन, यसै गरी फर्स्ट रनर अपलाई ३ लाख रुपैयाँ र १ तोला चाँदी, सेकेन्ड रनर अपलाई २ लाख चाँदी, थर्ड रनर अपलाई १ लाख रुपैयाँ र १ तोला चाँदी र चौथो हुनेलाई ५० हजार रुपैयाँ र १ तोला चाँदी पुरस्कार स्वरूप प्रदान गरिने आयोजकले बताएको छ । नायक, गायक, डान्सर रमेशबाबु थापामगरले हराउँदै गएको मगर भाषा, संस्कृति, वेशभूषा, परम्परालाई चिनाउन मिस मगर इटरनेशनल कार्यक्रमको आयोजना गरिएको बताए । यस्तै सुनगाभा नेपालका अध्यक्ष थमप्रकाश पुनले मगर जातीको जनसंख्या नेपालमै तेस्रो ठुलो रहेकोले आफ्नो भाषा, रहनसहन, धर्म, संस्कार, खानपानलाई संसारमै चिनाउन लागि पर्ने बताए । ‘यो कार्यक्रमलाई हामीले सफल बनायौँ भने पछिको पुस्ताले पनि यसलाई अङ्गाल्नेछ ।’ अध्यक्ष पुनले बताए ।