काठमाडौं। गायक तथा मोडल लक्ष्मण श्रीको “म तिम्रै डल्ले हो” नामक नयाँ गीतको भिडियो सार्वजनिक भएको छ । लोकप्रिय सर्जक एकनारायण भण्डारीको शब्द रचना रहेको सो गीतमा आशिष अविरलले संगीत दिएका छन् । शुक्रबार राजधानीको एक होटेलमा आयोजित कार्यक्रममा पत्रकार भेटघाटसँगै गीतको भिडियो सार्वजनिक गरिएको थियो ।

गायिका मिलन र गायक लक्ष्मणको युगल आवाज रहेको गीतमा एकले अर्कोलाई माया प्रेमका भाव प्रकट गरेका छन् । त्यस्तै, डान्सिङ बिटमा तयार भएको गीतको भिडियोमा ‘कार्टुन क्रु’का सरोज अधिकारीले निर्देशन, कोरियोग्राफी तथा सम्पादन गरेका छन् भने पवन सुश्लीङले छायांकन गरेका हुन् ।

सोही भिडियोमा निर्देशन गरेका सरोज अधिकारी, मोडल आश्मा विश्वकर्मा, गायक तथा मोडल लक्ष्मण श्री र मोडल स्मारिका ढकालको नृत्य रहेको छ ।

गायक श्रीले गीतको भिडियो सार्वजनिक कार्यक्रममा बोल्दै यसपटक केही फरक एवं पृथक गीत र भिडियो ल्याएको बताए । साथै, गीतको भिडियोलाई नृत्यमा सुहाउने मोडल सरोज अधिकारी, आश्मा विश्वकर्मा र स्मारिका ढकाललाई छनोट गरेको उनले सुनाए ।

भिडियोले बजारमा राम्रै चर्चा पाउने गायक लक्ष्मणको विश्वास छ । उनले भने, ‘यस पटकको गीत र भिडियो दुवैमा केही फरक र पृथक विषयवस्तु समावेश छन्, विगतमा पनि म आफैँले आवाज दिएका गीत र भिडियोहरूले बजारमा राम्रै चर्चा पाएका थिए, अहिलेको गीतले पनि राम्रै सपलता प्राप्त गर्छ भन्नेमा विश्वास लिएको छु ।’

भिडियो सार्वजनिक कार्यक्रममा बोल्दै वरिष्ठ पत्रकार ऋषि धमलाले देशमा अहिलेको मौलाउँदो भ्रष्टाचार र राजनीतिक दलमा भइरहेको विभिन्न गतिविधिका विषयमा पनि कलाकारले आवाज उठाउनुपर्ने बताए । गायक लक्ष्मण श्रीले अहिले ल्याएको गीत र भिडियो माया प्रेमको भावनामा ओतपोत भए पनि हाल देशमा भइरहेको भ्रष्टाचारका विषयमा पनि गीतमार्फत नै आवाज उठाउन धमलाले आग्रह गरे ।

त्यसैगरी, वरिष्ठ पत्रकार एवं एपी १ टेलिभिजनमा ‘तमसोमा ज्योतिर्गमय’ का सञ्चालक टिकाराम यात्रीले कलाकार राज्यको अंग भन्दै आफूले गीत संगीत मन पराउने बताए । साथै, कुनै पनि कलाकारले अहिलेको अवस्थालाई मात्र मध्यनजर गरेर गीत सिर्जना गर्ने र म्युजिक भिडियो बजारमा ल्याउन नहुने बताए । कलाकार सधैँ एकैनास टिकिरहन सक्नुपर्ने भन्दै विगतदेखि भविष्यलाई पनि हेरेर अघि बढ्न उनले सुझाव दिए ।

गीतको भिडियो उनको आफ्नै युट्युब च्यानलमार्फत सार्वजनिक गरिएको हो ।

हेर्नुहोस् भिडियो ।