काठमाडौं । पर्वतको जलजला गाउँपालिका–२ मल्लाजको दहमा एक दम्पतीको हत्या भएको आज १८ दिन पुगेको छ । गत चैत २० गतेदेखि प्रहरीले अनुसन्धान गरेको भए पनि अहिलेसम्म घटनामा संलग्न दोषी पत्ता लागेको छैन ।

चैत १९ गते सोमबार राति स्थानीय ६९ वर्षीय सूर्यबहादुर जिसी र उनकी ६७ वर्षीय श्रीमती गमला जिसीको हत्या भएको अवस्थामा घरभित्रै शव फेला परेको थियो । घटनाको अनुसन्धानका लागि एक सातादेखि केन्द्रीय अनुसन्धान ब्यूरो (सीआईबी) को टोली समेत घटनास्थल वरिपरीनै अनुसन्धान गरिरहेको छ । जिल्ला प्रहरी कार्यालय पर्वतका प्रमुख प्रहरी नायब उपरीक्षक खुमलाल भुसालको नेतृत्वमा २५ जना प्रहरीको टोली घटनास्थल मै खटिएको छ ।

गण्डकी प्रदेश प्रहरी कार्यालयको प्राविधिक टोलीले समेत अुनसन्धानलाई तीव्रता दिएको भए पनि दोषी पहिचान गर्न सकस भइरहेको पर्वतका प्रहरी नायब उपरीक्षक खुमलाल भुसालले जानकारी दिए । यही घट्नालाई मध्यनजर गर्दै पर्वत, मल्लाजमा जन्मिएका गायक सुजन बराईलीको नयाँ गीत “मलाजको घट्ना” सार्वजनिक भएको छ ।

हत्यारा पत्ता लगाउन सहज होस् भनी यस घट्नामा भएका कुराहरुलाई गीतमा उतार्ने कोसिस गरी दबाब स्वरुप यस गीत सार्वजनिक गरिएको कुरा गायक सुजन बराईलीले जानकारी गराएका छन् । अपराधीलाई खोजी गर्न र मृतक परिवारको न्यायका लागी यस गीतले महत्वपुर्ण भुमिका खेल्ने छ भन्ने बिश्स्त समेत रहेको गायक बराईलीले बताए । साथै अपराधीलाई पत्ता लगाई कानुन बमोजिम कडा भन्दा कडा कारबाही गर्न गायक सुजन बराईलीको पनि जोडदार माग छ ।

“मल्लाजको घट्ना” नामक गीतमा गायक सुजन बराईलीको स्वर, शब्द, संगीत रहेको छ । यस गीतलाई समित परियारले एरेञ्ज गरेका हुन् भने रमेश सेञ्चुरीले मिक्सिङ गरेका हुन् । यस गीतको भिडियोलाई पत्रकार प्रकाश बराईली “अभिब्यक्ति” ले निर्देशन गरेका हुन् भने महेश महारको छायांकन र रबिन बिको सम्पादन रहेको छ ।

गीतको भिडियोमा गायक सुजन बराईली, शोभित बिश्वकर्मा, रमेश सेञ्चुरी र अन्य ब्यक्तिहरुको अभिनय रहेको छ । यस गीतलाई सुजन बराईलीको युटुब च्यानलबाट सार्वजनिक गरिएको हो ।

हेर्नुहोस् भिडियो ।