सहरसा (बिहार)। भारतको बिहार राज्यस्थित सहरसामा आयोजित “रक्तदाता महाकुम्भ–२” कार्यक्रममा नेपाली साहित्यकार, समाजसेवी तथा राजनीतिक व्यक्तित्व इन्दिरा निरौला सम्मानित भएकी छन् । स्वर्गीय इन्द्र देव सिंहको पुण्यतिथिको अवसरमा आयोजित कार्यक्रममा मानव सेवा, साहित्य, सामाजिक नेतृत्व तथा नेपाल–भारत मैत्री सम्बन्ध सुदृढ बनाउन पुर्‍याएको उल्लेखनीय योगदानको कदर गर्दै निरौलालाई प्रशंसापत्र र मायाको चिनो प्रदान गरी सम्मान गरिएको हो ।

सम्मान समारोहमा भारत र नेपालका ठूलो संख्यामा स्वैच्छिक रक्तदाता, शिक्षाविद्, चिकित्सक, समाजसेवी तथा विभिन्न क्षेत्रका विशिष्ट व्यक्तित्वहरूको उल्लेखनीय उपस्थिति रहेको थियो ।

सम्मान ग्रहणपछि बोल्दै निरौलाले रक्तदानलाई सबैभन्दा ठूलो महादानको संज्ञा दिँदै युवापुस्तालाई नियमित रूपमा स्वैच्छिक रक्तदानमा सहभागी हुन आग्रह गरिन्। उनले एक युनिट रगतले आवश्यकतामा परेका व्यक्तिको जीवनमा नयाँ आशा र ऊर्जा दिन सक्ने उल्लेख गर्दै मानव सेवामा सबैको सक्रिय सहभागिता आवश्यक रहेको बताइन् ।

निरौलाले सम्मानका लागि आयोजक समितिप्रति आभार व्यक्त गर्दै यस्ता कार्यक्रमले समाजमा सेवा, सहयोग र मानवताको भावनालाई थप सुदृढ बनाउने विश्वास व्यक्त गरिन्। साथै, उनले नेपाल र भारतबीच रहेको ऐतिहासिक, सांस्कृतिक तथा आत्मीय सम्बन्धलाई अझ प्रगाढ बनाउन यस्ता सामाजिक अभियानले महत्वपूर्ण भूमिका खेल्ने धारणा राखिन् ।

कार्यक्रमको समापनमा आयोजक समितिले उपस्थित अतिथि, स्वैच्छिक रक्तदाता तथा सहयोगीहरूप्रति धन्यवाद ज्ञापन गर्दै मानव सेवामुखी यस्ता अभियानलाई आगामी दिनमा पनि निरन्तरता दिने प्रतिबद्धता व्यक्त गरेको थियो ।