नेपाली संगीत क्षेत्रमा नयाँ स्वाद बोकेको गीत ‘एकै बित्ताको दूरी’ सार्वजनिक भएको छ। सार्वजनिक भएसँगै गीतले सामाजिक सञ्जालदेखि युट्युबसम्म सकारात्मक प्रतिक्रिया बटुल्न थालेको छ। गीतमा चर्चित गायक बसन्त थापा र गायिका मेलिना राईको सुमधुर स्वर रहेको छ। प्रेम, दूरी र भावनात्मक सम्बन्धको कथालाई संगीतमार्फत प्रस्तुत गरिएको गीतले श्रोतालाई भावुक बनाउने प्रयास गरेको देखिन्छ।

गीतका शब्द प्रल्हाद सुवेदीले लेख्नुभएको हो भने संगीत स्वयं बसन्त थापाले तयार गर्नुभएको हो। संगीत संयोजन, मिक्सिङ तथा मास्टरिङ श्यामश्वेत रसाइलीले गर्नुभएको छ। भिडियो पक्ष पनि उत्तिकै आकर्षक बनेको छ। निर्देशक सुनिल क्षेत्रीको निर्देशनमा तयार भएको भिडियोमा सुनिल क्षेत्री र गीता ढुंगानाको अभिनय देख्न सकिन्छ। उत्कृष्ट छायांकन, भावपूर्ण प्रस्तुति र दृश्य संयोजनका कारण भिडियोले दर्शकको मन जितिरहेको प्रतिक्रिया प्राप्त भइरहेको छ।

गीत पशुपति म्युजिक अफिसियल युट्युब च्यानलमार्फत सार्वजनिक गरिएको हो। सार्वजनिक भएको छोटो समयमै गीतले दर्शक तथा श्रोतामाझ राम्रो चर्चा कमाउन सफल भएको छ। सामाजिक सञ्जालमा धेरैले बसन्त थापाको संगीत र स्वरको खुलेर प्रशंसा गरेका छन् भने प्रल्हाद सुवेदीका शब्दलाई पनि गीतको मुख्य आकर्षणका रूपमा लिइएको छ। त्यस्तै, निर्देशक सुनिल क्षेत्रीको प्रस्तुतिलाई दर्शकले विशेष रुचाएका छन्। निर्माण टिमले गीत सुनेर तथा भिडियो हेरेर आफ्ना अमूल्य प्रतिक्रिया दिन सम्पूर्ण दर्शक तथा श्रोतासमक्ष आग्रह गरेको छ।