नेपाली कांग्रेसको १४ औं महाधिवेशनमा युवाहरुको आकर्षण बढ्दै गइरहेको छ। सोही क्रममा बझाङकी एक २२ वर्षीया युवती पनि महाधिवेशन प्रतिनिधिको रुपमा विजयी भएकी छिन्। 

जयपृथ्वी नगरपालिका वडा नम्बर १० की सृजना स्नेही शनिबार बिहान सम्पन्न मत गणनाको परिणाम अनुसार विजयी भएकी हुन् । उनले अत्यधिक ६८७ मत सहित पहिलो नम्बरमा दलित महिला कोटाबाट केन्द्रीय महाधिवेशन प्रतिनिधिमा जित हात पारेकी हुन्।

कञ्चनपुरको बैजनाथ इन्जियरिङ क्याम्पसमा सब–इन्जिनियरिङ अध्ययन गरिरहेकी उनले आफ्नो बुवा पदमबहादुर स्मृतीको सपना साकार पार्न राजनीतिमा होमिएको बताइन्।

“बुवाको महाधिवेशन प्रतिनिधि बन्ने सपना थियो। तर ३ महिनाअघि उहाँको निधन भयो। त्यसपछि मैले उहाँको सपना पूरा गर्नकै लागि चुनाव लडको हुँ” उनले भनिन्।